Wednesday, August 5, 2015

In The First Person, Magaza, Bitola









Изложба на современи автопортрети на млади македонски уметници „Во прво лице“ се отвора вечерва во 20 часот во битолската Магаза при Националната установа Завод и музеј – Битола.
„Во прво лице“ претставува избор на дела од истоимената изложба одржана во април-мај 2015 година во Националната галерија на Македонија, објект „Мала станица“ и на истражувачкиот проект „Автопортретот во современата македонска уметност од 1990 година до денес“.
Гостувањето на оваа изложба во Битола се реализира во рамките на проектот „Kич, да ?! / Сте или не?“, 2015, организиран од страна на Дирекцијата за култура и уметност – Скопје, НУ Национална галерија на Македонија и НУ Завод и музеј – Битола.
– Делата претставени на изложбата „Во прво лице“ се однесуваат на поинаква ангажирана појавност на авторот во сопствените дела. Ова иницијално истражување на едно своевидно современо автопортретирање презентира дел од авторите кои во различни медиуми го опфаќаат третманот на себеприкажувањето во делата на современите македонски уметници, особено помладата генерација автори. Генерациската припадност и изборот на делата создавани од втората половина на 90-тите години на 20 век и особено 21 век, говорат за различните творечки стимулации и медиуми како илустрација на случувањата во контекст на, пред с`, македонската општествената реалност во изминативе речиси 20 години – соопшти Националната галерија на Македонија.
Организаторот истакнува дека изборот, базиран врз дела и автори кои поттикнуваат реакции преку различни содржински компоненти, ја изоставува издвоената интроспекција, и фокусот се поместува на личното доживување кон надворешниот свет. Авторите критички и директно реагираат на стварноста околу нив, без оглед дали таа стварност е нарација од минатото и е базирана врз лична, семејна, колективна, национална меморија, ироничен однос кон историјата на уметноста, институциите, системот и маркетингот на уметноста, или, пак, е саркастичен однос кон доживеаната или „претскажана“ актуелна културно-политичка и социјална стварност.

No comments:

Post a Comment